Abonda a documentación que acredita que o Camiño de Santiago a Muxía pasaba por Brandomil. Desde axendas de peregrinos, ata diferentes referencias, evidencias e probas que a Asociación Grandimirum recolleu nun estudo realizado polo prestixioso antropólogo experto en Camiños, Manuel Vilar.

Este amplo informe elaborado por este doutor en Antropoloxía foi presentado ante Patrimonio da Xunta de Galicia para que se lle concedese o recoñecemento administrativo desta vía. Sexa como for, centos de peregrinos pasan cada ano por Brandomil para rematar a súa ruta en Muxía, sobre todo a pé ou en bicicleta.

Ademais, para avanzar no recoñecemento e facilitar o camiño aos peregrinos, elabórase a guía editada por Alvarellos do camiño, cuxo autor, Manuel Vilar, fai unha aproximación a este percorrido pola historia e as anécdotas que ao longo dos anos se sucederon neste traxecto, de Santiago a Muxía, pasando por Brandomil e a súa ponte romana-románica.

No propio Plan Xeral de Ordenación Municipal , aprobado pola Xunta de Galicia, recóllese a existencia desta vía.