Brandomil está cheo de historia, de presente e de futuro.
Aquí estivo un dos principais asentamentos romanos do Noroeste peninsular entre os s. I e IV.
De par da Ponte Vella, pola que cruzan o río Xallas desde hai séculos os peregrinos de Santiago a Muxía, loce o único treito visible dunha vía romana orixinal en toda a provincia da Coruña.
A pé deles hai un castro da Idade do Ferro de características singulares.
O conxunto histórico esténdese por un xacemento arqueolóxico que descobre parte do notable entramado urbano romano entre os restos dun aglomerado que supera as 20 hectáreas.
Estudar, protexer e dar a coñecer todo isto é o propósito e a razón de ser da Fundación Brandomil.
